محبوبتي بعـــيدة
مهداة إلى كل مثقفي وعمال الثقافة بسعيدة

نَعْــطي رْمُـــوزْ للمَحبُوبَة وسْمَـاهَا
والوالْعِــــينْ مَا يَثْنِــيْهُمْ مطْــــلُوبْ
قَــــبْلْ الكــــلامْ رُدْ الكَلمَة لَجْــوَاهَا 
فالوادْ يَا بْنِي مَا يَعْشَرْشْ الطُــوبْ
ستَين60 شَـاوْهَا والسبعين70 وْرَاهَا 
عَشْرَة 10 مْوَالْيَة والربْعَة4 مَنْصُوبْ 
النَاسْ كُلْ حَــبَّتْ تَشْرُبْ مَنْ مَــاهَا 
وَانَا فْ دَارْ حُـــبِّيْ مَالِيْ مَحْــبُوبْ 
السين ســـر من عــــند الله عطاها 
والعين دايـرة دون العــين حجوب
اليا حوات ريــح الـﭬصبة وغنــاها 
والدال شـــاهدة للكــاس المدْعُوبْ
يَا دَاخْــلَ المْــدِيْنَة سَــلَّمْ لَثْـــــرَاهَا 
ساسي العَـافْيَة لا تُغْـــدَى مَعْطُوبْ
طرْشُونْ في وْكَرْهَا بَايَتْ عَسَّاسْ
يَا دَاخــــــلْ المْـدينة سَــلَمْ تَسْــــلَمْ 
الظن في الحْـــبيبة رامي قَيَّــاسْ
أرض النْقَــــارْ نَاقَــــرْ كَانْ تْنَجَّــــمْ 
وَلَّا خْطِيْكْ رَيَّحْ مَنْ وَجْـــعْ الرَاسْ
فُرْسَانْ رَاكْـــبِينْ خْيُــــــولْ تْهَضْلَمْ 
مَنْ حَسْهَا تْخَافْ يْجِيْكْ الوَسْوَاسْ 
مَهْمَا تبَانْ مَهْمَا شَــــــــــانَكْ يَعْظَمْ 
تَبْقَى قْبَــالْهَا قطرة وَسْـط الكَـاسْ
فيها اللي يْجـــيبْ خْبَارَكْ مَنْ ثَــــمْ 
وَيْحَوْطُوا عْـــلِيكْ صوار الدَرْيَاسْ
دُرْكْ البْــــلَى لْسَـــــانَكْ يَا بُونَـــادَمْ 
كِيْمَا تْقِـــيسْ خَـــيَّك لازَمْ تَتْقَـــاسْ
خُوذْ الكْــــلامْ يَا سَامَعْنِيْ وفْهــــــَمْ 
مَا رَاحْ لِيكْ رايَح في عَيبْ النَاسْ

وَانَا اللي عْلِـــيهْ عْــــوَاميْ ننظم 
مَا قَـالّيْ حْوَالْ خْبَـــــارَكْ لا بَـاسْ
مَاذَا تْعَـــدّْ يَا رَاجَلْ فَاضْ الكَـــاسْ
محبوبتي عْلَى السَعْدْ هْلِيْ سْماوْها 
والسَعْدْ في سْعِيْدَة خـــالف لغراس
فِيهَا لْقِـيتْ جَـــنَّة وَنْجُومْ ضْوَاوْهَا 
رَوْضة مْشَهْرَة في حُـــلَّة وُلْبــاسْ
الفُـلْ والقْرُنْفُلْ في الارضْ كْسَاوْهَا 
والياسْمين والنَسْـرينْ مْعَ اليَــاسْ
وَطْيُورْ في غْصَانْ تْلاغُوا زَهَّاوْهَا 
يَحْيُو حْسَاسْ فاللي ما ليه حْسَاسْ
إذَا وْصَفْتْ وَصْفي ما يِبْـلَغْ شَاوْهَا 
في ساحل الحْــبِيْبَة ضاعْ المَقْيَاسْ
معْشُوقْتي انطــربت للي عــادَاوْهَا 
وَهْدَاتْــني انْلاجِي فـــيدْ النَّخَّـــاسْ
مَكْمُــــولَة البْهَى حُسَّـــادْ تْبَنَّــاوْهَا 
وعْـﭭابْهَا تْمَــــلَّكْ كِي وَلَّـــــى رَاسْ

مَهْــــما نْسَـــاتْنَا والله مَا نَنْسَـاوهَا 
حَرْمْ الحْبِيْبْ مَا نَرْضَـولُو يَنْقَــاسْ
مَاذَا تْعَـــدّْ يَا رَاجَلْ فَاضْ الكُـــوبْ

محــبوبتي سْمَـاهَا ذكرُو يَسْعَـــدْ 
وَصْبَاحْهَا يْفُــكْ خْــبَال المكْــروب
مكْروب في هْـواهَا رَاني وَاقَـــدْ 
والشوك حـال بيني بين المرغوب
مرغوب خَاطْري قَصْدِي والمرْصَدْ 
نَصْفى الجـــافية في بَهْرَاج الثوب
الثـوب فِيْ بْعَــادَكْ عَــادْ يْـبَـــرَّدْ 
والـﭬلب فـوقْ نَــارَكْ ما زال يْذوبْ
يْذوبْ مَنْ دْخَـلْ سَـاعَة للمَصْهَدْ 
وَانَا سْنِينْ فُــوقْ جْمَارَكْ مَجْـدُوبْ
مَجْـــدُوبْ للحْبْيبَة نَبْـقَى نَنْشَـــدْ 
مَهَمَا انْزَلْتْ تَبْقَـــالِيْ عَـــزْ رْكوبْ

زيعر عمر / بن علال